أمد/ ولك يا عمّي "بلاد العُرب اوطاني، من الشام لبغداد ومن طنجة لتطوانِ"،

والله يا جماعة الخير بلاد عُربنا مخردقة وميكلة هوا هالايام،

وإلّي بيزيد الطين بلّة إلُي بيصير في سوريا، يا لطيف يا رب إلطف فينا،

مجازر وقتل على الهوية وقتل على اسم الطائفة،

طيّب يا عمّي فهمنا انّة نظام آل الاسد أو آل الارنب كان دموي وفئوي وظالم، طيّب مهمّ إلّي اجوا بدالُه بيمارسوا نفس الشيء وبيخيّطوا بنفس المسلّة والعياذ بالله،

المدنيين ما إلهُم دخل وعيب وحرام التعدّي عليهم، علوي سنّي شيعي كردي بيزنطي نطّاط الحيط، ما دام مدني لازم احترامه وحمايه وما حدا يطبّ فيه، مهياش زلوميّة الشطارة على المدنيين واعدامهم ونحرهم مثل الخرفان ولّا مثل الجاج،

يعني اذن شو خلّوا للمجرمين الصهيانة إلّي بيعملوا هيك عمايل في غزة وفي الضفة الغربية وفي جنوب لبنان،

طيب يا عمّي ما سويسرا اربع كنتونات باربع قوميات وطوائف واثنيات واربع لغات مختلفة، لكن ماشيين وعايشين مع بعضهم مثل السحلب،يعني حرام لو العرب يعيشوا زيّهم، ويتعلّموا منهم،

مع انه العرب شاطرين بالشعر والشاعر العربي بيقول: "لا تنهى عن خلق وتأتي مثله، عارٌ عليك اذا فعلت عظيم!!"،

ما انتو في سوريا عملتوا ثورة عشان تسقّطوا نظام بشار الاسد الظالم، طيب مهو انتم صرتوا بتمارسوا نفس الظلم ونفس الاسلوب، الظلم ظلم من وين ما اجى والمظلوم مظلوم مين ما كان،

طيب يا عمّي مهيّا اسرائيل بنتعربد عليكم وصارت محتلة نص سوريا وقريبا ما جنودها يشربوا قهوة على صفاف نهر بردى، طيب مطّخولكوم كم من رصاصة على جنود الاحتلال الاسرائيلي وموش على اولاد بلدكم المدنيين،

الشغلة مهياش مزحة وبدها وقفة جدّية لانّه الدم بيجر دم،

وخذوا المثل من التشيلي ومن جنوب افريقيا في المصالحة المجتمعيّة،

والله يهوّنها على سوريا وعلى العراق وعلى اليمن وبصورة خاصة على فلسطين.